​Man City ​​​ធ្លាក់​ចេញ​ពី UCL ក្រោយ​ចាញ់ Barca ខណៈ ​Aguero ​ប៉េណាល់ទី​អត់​ចូល

ក្រុម​ម្ចាស់​ជើង​ឯក​អង់គ្លេស​ Manchester City ​បាន​ធ្លាក់​ចេញ​ពី​ពាន​រង្វាន់​កំពូល​ទ្វីប​​អឺរ៉ុប UEFA Champions League ​ត្រឹម​តែ​វគ្គ​១៦​ក្រុម​ចុង​ក្រោយ​​នេះ​ហើយ បន្ទាប់​ពី​ចាញ់​ក្រុម​ជើង​ខ្លាំង​អេស្ប៉ាញ FC Barcelona ១-០ ទៀត ក្នុង​ការ​ប្រកួត​ជើង​ទី​២ កាល​ពី​យប់​មិញ និង​សរុប​ទាំង​២​ជើង​ Barca ឈ្នះ ៣-១។

១​គ្រាប់​របស់​ក្រុម​អ្នក​មាន​បុណ្យ​ គឺ​ធ្វើ​បាន​សម្រេច​ដោយ​កីឡាករ​ជម្រើស​ជាតិ​ក្រូអាត Ivan Rakitic ដោយ​ស៊ុត​​​​បំប្លោង​ផុត​ដៃ​ អ្នកចាំទី Joe Hart បន្ទាប់​ពី​ការ​បញ្ជូន​ដ៏​ល្អ​មក​ពី​ជើង Lionel Messi។ ទោះ​យ៉ាង​ណា ក្រុម​ទាំង​២​នៅ​តែ​មិន​អាច​ស៊ុត​បញ្ចូល​ទី​គ្នា​បាន​ថែម​ទៀត ខណៈ​ដែល Neymar, Messi និង Suarez ​មាន​ឱកាស​ស៊ុត​ល្អៗ​ដែរ ប៉ុន្តែ ​Joe Hart ជួយ​សង្គ្រោះ​បាន។​

​​ខ្សែ​ប្រយុទ្ធ Sergio Aguero ​មាន​​ឱកាស​ទាត់​បាល់​​ប៉េណាល់ទី​១​​គ្រាប់​ដែរ​នៅ​នាទី​៧៨​ បន្ទាប់​ពី​ Gerard Pique ​ធ្វើ​ឲ្យ​មាន​កំហុស​នៅ​ក្នុង​តំបន់​គ្រោះ​ថ្នាក់​ ប៉ុន្តែ​​ធ្វើ​មិន​បាន​សម្រេច​ ក្រោយ​អ្នកចាំទី Andre ter Stegen ​សង្គ្រោះ​បាន។ ​ការ​បរាជ័យ​នេះ​មាន​ន័យ​ថា ក្រុម​ខ្លាំង​របស់​អង់គ្លេស​ បាន​ធ្លាក់​ចេញ​ពី​ពាន​រង្វាន់​កំពូល​មួយ​នេះ​អស់​ហើយ។











​នេះ​ជា​ការ​បរាជ័យ​​លើក​ទី​៤​ហើយ សម្រាប់​ក្រុម​មេឃ​ខៀវ ក្នុង​ការ​ប្រកួត​៥​លើក​ចុង​ក្រោយ​នេះ ហើយ​​អ្នក​ចាត់​ការ​ Manuel Pellegrini អាច​នឹង​កាន់​តែ​មាន​សំពាធ​ថែម​ទៀត ព្រោះ​តែ​ក្រុម​របស់​លោក អាច​នឹង​បាត់​បង់​ឱកាស​​​​លើក​ពាន​អ្វី​ទាំង​អស់​​នៅ​រដូវ​កាល​នេះ​ ខណៈ​ដែល​​នៅ​ Premier League ​ពួកគេ​​តាម​ពី​ក្រោយ Chelsea ​ដែល​នៅ​សល់​១​ប្រកួត​ក្នុង​ដៃ ចំនួន​៦​ពិន្ទុ​ថែម​ទៀត៕

ប្រភព៖Sabay

SHARE

Milan Tomic

Hi. I’m Designer of Blog Khmer Mall 24. We have all entertainment type like News,Technology,Games,App,Live TV and Software.

• 
• 
• 
• 
•