កែវ រំចង់ វ៉ៃថៃឲ្យសន្លប់ទឹក៤ ខណៈ វង្ស ណយ ត្រូវថៃវ៉ៃឲ្យសន្លប់ទឹក៤

ការប្រកួតសន្សំពិន្ទុយប់មិញក្នុងព្រឹត្តិការណ៍ដណ្ដើម ខ្សែក្រវាត់ខារ៉ាបាវនៅសង្វៀនបាយ័នស្ទឹងមានជ័យ កែវ រំចង់ បានផ្តួលជើងខ្លាំងថៃឲ្យសន្លប់ធំក្នុងទឹកទី៤ ខណៈ វង្ស ណយ ត្រូវអ្នកប្រដាល់ថៃកម្ពស់ខ្ពស់ឡើងមួយជង្គង់ឲ្យសន្លប់ធំក្នុង ទឹកទី៤។

កែវ រំចង់ ធ្វើបានយ៉ាងល្អដោយផ្ដួល Sarm Dieng Petch Nop Kav ក្នុងទឹកទី៤ឲ្យសន្លប់ធំលើសង្វៀនតាមរយៈកណ្តាប់ដៃលើពោះទឹក។ ចាប់ផ្ដើមដើមទឹកទី ១ រំចង់ ហាក់មានភាពលំបាកដោយសារន្ទះជើង Sarm Dieng Petch Nop Kav ព្រោះរបៀបទាត់ហាក់ប្លែកដែល រំចង់ ពុំធ្លាប់ជួប។
អ្នកប្រដាល់មកពីបាត់ដំបងប្រាប់ថា ៖« ខ្ញុំស្មានថា គេទាត់ក្រោម ដឹងអី គេចេះរលាស់ជើងឡើងមកលើវិញធ្វើឲ្យខ្ញុំគេចមិនទាន់»។ ទោះជាយ៉ាងណា រំចង់បានព្យាយាមវាយតាមបច្ចេកទេស និងធ្វើបានកាន់តែល្អ។ ទីបំផុតកីឡាករកម្ពុជារូបនេះបានវាយលើធុងទឹករបស់ Sarm Dieng Petch Nop Kav ឲ្យសន្លប់ធំក្នុងទឹកទី៤។

ចំណែកកូននាគ វង្ស ណយ ត្រូវបានគេមើលឃើញថា ធ្វើបានយ៉ាងល្អសម្រាប់៣ទឹកដំបូងដែលអាចប្រៀបលើជើងខ្លាំងថៃ Rareung Lukchampachai ទៅហើយ ប៉ុន្តែចូលដល់ទឹកទី៤ អ្នកប្រដាល់ថៃបានប្រើមួយជង្គង់ស្របពេលកូននាគធ្វេសប្រហែស ហើយក៏ដេកដួលសន្លប់ធំតែម្តង។

ដូច្នេះ កែវ រំចង់ទទួលបាន៦ពិន្ទុពេញពីការប្រកួតពីរលើកស្របពេល វង្ស ណយ និង Rareung Lukchampachai ទទួលបាន៣ពិន្ទុដូចគ្នាពីការប្រកួតពីរលើកចាញ់មួយ និងឈ្នះមួយដូចគ្នា៕